لو انت واحد من ملايين المصريين اللي رايحين يشتروا في عروض كارفور في الذكري ال 20 ليها

فانت اكيد محتاج تعرف ايه كارفور ؟ وجت منين ؟ ومين ملاكها ؟

سنة 1959 تلاته من رجال الاعمال في فرنسا واللي كانوا ملاك لمحلات و مراكز البيع بالجملة

فكروا انهم يعملوا نموذج جديد قايم علي انك تخدم نفسك بنفسك

الاول جربوا تجربة صغيرة في محل حجمه 200 متر ولما نجحت السنة اللي بعدها عمله محل حجمه 850 متر 

بدل ما بتطلب الحاجة من البيع بتروح تجيبها في نفسك تحطها في عربية التسوق و تحاسب في الاخر

مع نجاح التجربة سنة 1963 عملوا هايبر لاول مرة في فرنسا حجمة 2500 متر وفيه 40 موقف

♦️طريقة عمل كارفور كانت مميزة لانه اعتمد علي اللامركزية في البداية

الحسابات كلها مع الادارة لكن اختيار المنتجات وحساب الربحية والخسائر كان بيعملها مدير الفرع وده كان عامل حالة نجاح علي عكس المتوقع لان مدير المكان كان قادر يفهم طبيعة المجتمع المحيط والمنافسة اللي فيه

ده انعكس كمان علي الادراة اللي كانت صغيرة جدا ما تتعداش ال 12 شخص اكترهم لإدارة الشئون المالية

♦️نقطة تانية مميزة في كارفور فكرة الPrivate  label منتجات خاصة بكارفور حوالي خمسين منتج قدموها بدري جدا سنة 1976 خليتهم عندهم قدرة علي تقليل الاسعار وتكبير الارباح والمفاوضة مع الموردين 

♦️لكن كارفور كان عندها حرب مع منافسيين كتير في فرنسا فابتدت تتعلم consumer behaviour ايه تفضيلات العملاء بتوعها وتتعامل تبعا لكده

ده بيحتاج داتا كتيرة ومرونه في الادارات خصوصا ادارة المشتريات

من الحجات اللي لاحظوها في كارفور تغير في سلوك المستهلك وتفضيله للمنتجات الفريش الطازة  اكتر من المعلبات فغيروا بشكل كبير من شكل الهايبر بتاعتهم 

♦️كمان اتعلموا space productivity احنا مش بنفتح هايبر كبيرة وخلاص

لاه ده بيتحسب المبيعات لكل متر عاملة ازاي

وفعلا قدروا يزودوا مبيعات كل متر من 19 فرانك سنة 1974 ل 55 فرانك سنة 1985

♦️كمان دخلوا في تحالفات مع منافسين عشان يزودوا قدرتهم علي الفصال مع الموردين 

وهكذا خلال رحلة التعلم ده بقي عندهم نموذج فعال في ادارة جيدة ولا مركزية كبيرة في نفس الوقت

كارفور اتوسعت من وقت مبكر في ايطاليا و اسبانيا وبعدين البرازيل

ووصلت منطقتنا العربية سنة 1995 مع الفطين اللي فتح في كل دول الخليج تقريبا

◀️ووصلت مصر سنة 2002

في مصر كارفور توسعت بشكل كبير وعدد فروعهم حاليا في حدود 70 فرع

◀️لكن المهم هو حصتهم السوقية اللي وصلت لحوالي 20 % 

وده رقم مهول بيعكس اختلاف كبير في العادات الاستهلاكية لشريحة واسعة من الناس

 الشريحة ده بقت بتفضل تشتري الحاجة من مكان واحد ومرة او مرتين في الشهر بدل التسوق اليومي اللي كانت امهاتنا بتعملوا

◀️السنة اللي فاتت في عيد ميلاد كارفور في مصر المبيعات وصلت ل 2.3 مليار جنية

 واعتقد بسبب الظروف الحالية واحتياج المصررين للخصومات فالرقم ده مش حيقل عن 3 مليار جنية 

في اكبر حدث للشرا في مصر بعد البلاك فريداي

بتشتري من كارفور؟ لو اه او لا قولنا ليه ؟

وهل كارفور حيكون قادر علي حصته السوقية الفترة الجاية في وسط المنافسة المشتعلة ؟